鹹到癲！周柏豪連詩雅咀嘴勁重口味

藝人周柏豪於新片《西謊極落：太爆．太子．太空艙》分別與連詩雅（Shiga）及雨僑有咀戲，看似艷福無邊，不過日前三人接受訪問，柏豪表示與兩女kiss感覺不一，與雨僑的雨中電話亭之吻，乃向某經典電影致敬，而與Shiga的激情之吻卻鹹味十足，他謂：「場戲講我食緊米線，佢返嚟喊，當時我嘴入面有條春卷，佢眼淚又鹹，所以成場戲都好鹹囉！」

患幽閉恐懼症

談到戲中講述他因冇錢而要遷入僅得太空艙般大的床位生活，柏豪透露首次體驗於狹窄環境生活，坦言現實生活中應不能接受，他謂：「戲入面就拍攝已經做大咗個太空艙，真實會再細啲，如果真正要我住會好唔舒服，因為我有幽閉恐懼症，唔可以喺狹窄環境生存，搭?耐啲都唔得，以前試過搭港鐵感到有壓逼感，即刻要衝出閘，要見到個天先覺得安全，依家已經好好多。」

幸有精明父親樓換樓

對於住屋問題，柏豪坦言托賴有個精明父親，皆因當年入行前曾做模特兒，賺過一筆錢，其父便提議把酬勞交給他作投資，更謂：「應該係04、05年左右，我哋夾份買咗一個190幾呎、價值63萬嘅樓，當時做到9成半按揭，仲平過一架車嘅首期，結果住咗一、兩年就升到90幾萬，之後賣咗再買過大啲單位住。」

而生於小康之家的雨僑則揚言想買樓，她謂：「諗住呢一、兩年買樓，到時父母都會幫少少，咁我又唔去旅行、唔買手袋，所以儲錢好有效率。」至於Shiga就謂：「我同媽咪叫做有個地方住，我冇柏豪咁有投資頭腦，當年父母分開要幫補屋企，想儲錢都難，如果依家仲有當時柏豪咁嘅機會都仲可以買嘅。」

周柏豪髮型:Cliff @ Hair Corner

化妝:Vinci Tang

服裝:XPX

連詩雅髮型:Kate @ Hair Culture

化妝:Vinci Tang

雨僑化妝:Lisa C. @ Lisa C makeup Art

髮型:Ming @ St. private i salon