【矛盾】蕭正楠曹永廉賤嘴兄弟踩到盡
20170817
東網電視
更多新聞短片
蕭正楠和曹永廉成日鬥嘴，今次更大戰五個回合都難分高下！
蕭正楠和曹永廉在無綫熱播劇集《超時空男臣》中，以義兄弟身份引爆無限笑彈，而現實生活中兩人亦Friend過打Band情同兄弟，更不時「開波」互寸，內容既抵死又啜核，常常令人忍俊不禁。雖然他們相識多年，但仍有無窮話題繼續鬥嘴，似乎鬥到世界末日都不會停止，而今次他們就約出來大戰五個回合，打算在電視城內再分高下！
曹：曹永廉 蕭：蕭正楠
明踩暗幫夠高招
蕭正楠與曹永廉無論開工與否都經常鬥嘴，戰場更不時由現實生活搬到網絡世界，令全世界都邊食花生邊睇他們Mean爆的唇槍舌劍，而曹永廉更直指對方最口臭，但蕭正楠卻死撐自己其實是為兄弟着想。
曹：佢直頭係臭到冤！除咗屎尿屁，佢仲好陰毒同踩人，佢有時啲說話真係冇得返轉頭，我就唔係咁，我會留番條後路，希望可以大家快啲落台，所以對住佢會Tune番自己個台，希望同佢一句就到尾。
蕭：其實好多時都係明踩暗幫嘅，依家啲新聞係睇咗標題先會有興趣睇裏面寫咩嘛，所以一定要標奇立異先，例如佢喺《流行經典50年》唱歌，我就會彈佢唱得好難聽，咁先有人入去睇吓佢唱成點。
曹：但你多咗好多敵人喎！
蕭：呢份咁嘅友誼先無私呀，我寧願受萬夫所指，都希望人哋聽吓你唱歌！
曹：夠㗎喇，其實好多人都有留意！咁樣累咗自己，呢個人點解會咁蠢，下次唔好喇！
蕭：其實我計過數嘅！你嘅敵人多過朋友，鍾意我嘅人會多咗！
更年期下身不協調
娛樂圈競爭劇烈，天天都有不如意事上演，有人選擇忍氣吞聲，有人則選擇不平則鳴，而曹永廉就指自己會躁底向人開火，但很快便後悔，威完即刻戴頭盔。
曹：其實佢都幾好嘢，佢忍耐力好強。好多年前我忍耐力好強，但依家容易忟咗。
蕭：你更年期！下身不協調！
曹：仲冒汗添呀！其實可能係入行時唔敢出聲，依家係睇到有啲嘢唔啱會想改變吓。有時會因為咁而好唔開心，好想發火，但都會忍咗佢，因為一發完火我就會好後悔。
蕭：佢係小朋友嚟，發完火差唔多十分鐘後已經想講對唔住，因為佢覺得咁會令到對方唔舒服，所以會因為咁而道歉。
曹：佢忍耐力都幾強，工作上有好多問題會令到你好忟嘅，但係佢好有彈性，成日話「得喇」、「唔緊要」。
蕭：我係試吓喺人哋個崗位諗吓啫，有啲嘢對方未必想嘅，你又唔想，佢又唔想，當自己黑仔囉。忍受到嘅就盡量忍受囉，咁咪解決到件事囉。
守時男「鄙視」滋油人
曹永廉工作出名認真，每次做訪問、做活動必定會預早時間到達現場，但蕭正楠就覺得對方太Over，無論是工作還是日常生活都應該要放鬆、開心點，咁先至係人生。
曹：佢唯一缺點就係個人「滋滋油油」，我份人就好急躁嘅。如果拍劇中間有幾個鐘嘅話，我可能會喺公司睇劇本，但佢就會出去食番餐好，又例如我會早到，但佢就會校到啱啱好，好似好享受人生咁。
蕭：我真係覺得佢有啲嘢過分認真，今日個化妝師都問點解阿廉早咗成個鐘嚟，我覺得佢太過緊張！
曹：今日約十一點鐘化妝，我十點八返到，我唔啱，我早咗四個字，但佢十一點七先返到！
蕭：我控制到個化妝時間咪得囉！
啋！生日玩路祭？
除了口賤賤，曹永廉和蕭正楠仲格衰衰，不但試過毫不忌諱地咒對方死，更試過大搞「模擬路祭」，玩得勁盡勁癲！
曹：之前都玩得好盡，有時有啲Post講到佢好似過咗身咁，係玩多咗嘅。曾經早幾年生日，我同佢啲朋友、Fans同佢做生日，咁我就冇嘢買到，經過街市就買盒燒肉！
蕭：佢買咗盒燒肉，仲要係喺馬路邊開生日會，好似路祭咁！
曹：到上年我生日，佢買咗盒燒肉，仲插埋蠟燭！
蕭：生日梗係要插蠟燭㗎啦！我哋玩對方係玩到冇底線，玩得盡先係真兄弟嘛！咁大家唔會嬲嘅，好多時都係真心為對方好嘅，見到咩事發生都係幫對方先。
呢個老友乖女勿近
曹永廉曾大呻囡囡竟迷戀蕭正楠，直指對方似足盲頭烏蠅極冇眼光，而自認型男的蕭正楠當然樂意之至，但如果有日囡囡真的要下嫁一個十足蕭正楠的男生，到底曹永廉會不會嬲到噴火？
蕭：我覺得佢應該要開香檳！
曹：我諗我會同個女婿打交！好應該問吓翠如，到底佢爹哋O唔OK阿蕭，我覺得佢一定唔開心。同埋我唔想阿蕭同囡囡咁近，所以早排都掟咗佢扮女人嘅相出嚟，希望個女可以揀第二個。
蕭：你諗吓喇，一個細路女，佢父親就冇得揀喇，咪揀個好啲嘅偶像囉，咁都要妒忌，幾小器！依家畀佢成功咗㗎喇，佢個女真係對我有啲冷淡，好彩佢個仔識貨，可能鍾意啲肚兜相，同我聯絡多咗。