極度獸性！歐瑞偉一粒釘保鏢殺烏蠅

無綫劇集《同盟》正在熱播中，唔知大家覺唔覺得呢套劇好有《城寨英雄》Feel呢？首先係男女主角，同樣係陳展鵬搭胡定欣，講到內容，都係黑幫故事，絕對可以話係《城寨英雄》時裝版。劇粉仲記唔記得喺《城》裏面以缽仔糕店老闆楊竹鑾掩飾殺手組織頭目身份嘅歐瑞偉？其深藏不露嘅演技備受注目，當年仲首度獲提名「最佳男配角」。

歐瑞偉為人低調，但係認識佢嘅觀眾好多，因為乜劇都見到佢，只係唔知佢叫乜水。其實佢喺1985年已經參加藝員訓練班入行，從小接受體操訓練，入行前做過龍虎武師，係天王嘅御用替身、係錢小豪嘅師弟，憑努力及精湛演技開始為人熟悉，仲愈做愈有人氣，早年為內地電視劇擔任武術指導。今次歐瑞偉有份參演《同》，飾演龍頭一姐鮑起靜嘅貼身保鏢兼私人助理「易先生」，喺劇中講佢非常之揪得，用一粒釘都可以嚇窒持槍敵人！武功咁勁，難怪嚇到清潔姐姐愈叫愈走！

最近myTV SUPER上載咗段講易先生做保鏢嘅日常短片，片中清潔姐姐見佢拎住支鉛筆、自拍神棍同充電線，以為用嚟殺佢滅口，驚到要掉頭走！點知原來鉛筆只係用嚟開包花生食，自拍神棍用嚟打探老闆返咗工未；之後佢又用一粒撳釘殺死咗隻飛過嘅烏蠅；至於易先生拎住條充電線追住清潔姐姐，原來只不過係電話冇電，想問清潔姐姐借用「尿袋」，認真搞笑！唔少歐瑞偉嘅粉絲紛紛留言表示支持偶像，仲話由細睇到佢大，好期待佢其他嘅演出。

網民有話兒

Sxxxxen xxi：有鐵布衫就夠啦

余XX：百足寶寶，由細睇到您大，陶總管，依家晚晚溫緊《尋秦記》，感恩

xxxxy Wxxn xl：可怜（憐）的姐姐

Axxxe Chxx：好鬼型呀