衰乜嘢?袁詠儀自揭點解得罪成龍
袁詠儀(靚靚)喺社交網晒同成龍合照,一相泯22年恩仇,靚靚仲話成龍送咗份禮物畀佢添,不過,好多人都想知成龍當年點解嬲咗靚靚,靚靚接受東網電話訪問時就娓娓道來!
靚靚話:「其實呢個飯局係成龍、曾志偉、汪明荃佢哋三個發起,係邀請啲香港藝人返大陸做嘢遇上唔開心事,大家拎出嚟傾吓,志偉初時只邀請張智霖,冇叫我,不過我記番起一、兩年前知道有傳成龍唔鍾意我,所以希望藉今次機會見吓成龍,所以我自告奮勇問志偉可唔可以去,志偉就話可以。而成龍知道我嚟後,所以就用當年合作嘅電影《霹靂火》菲林製作嘅間尺送畀我,非常珍貴。」
靚靚又話喺現場問成龍當年有咩得罪佢,靚靚話:「成龍當時話我唔講佢都唔記得咗件事,原來係我廿年一次失場,令到佢有啲唔開心,不過依家冇嘢喇!」靚靚坦言自己唔知發生乜嘢事,只怪當年少不更事:「嗰時剛出道,真係要了解當時發生咩事而得罪人都唔知,真係唔好意思,令到成龍唔開心,不過依家冇事喇!」