集體回憶呀！《閃電傳真機》大聚會

唔知大家對兒童節目《閃電傳真機》有咩印象呢？呢個節目陪過唔少人長大㗎喇！雖然節目已經冇再做，但都成為咗唔少人嘅一個童年回憶！

一班曾經為節目效力過嘅藝人同幕後朋友，就舉行咗一個名為「搞大咗閃電傳真機同學會」嘅派對，當然重點係大家敍吓舊，結果一呼百應，總共有六十幾人出席，當中藝人包括兒童節目始祖譚玉瑛啦，仲有黎芷珊、伍文生、麥長青、黃智賢、魯文傑、姚安娜、張沅薇、唐瑋琪、蔡子健等等，童年回憶返晒嚟！好多網民都話好感動，雖然大家未必仲一齊共事，但可以抽空聚首一堂，人情味極濃呀。