甄子丹稱冇睇唔起吳京：我欣賞有實力嘅人

影星甄子丹與太太汪詩詩今晚出席慈善齋宴。當談及近日與吳京的是非，有指當年二人合作拍戲，子丹言語間似看不起吳京，及曾出手打壓他。面對種種傳聞，子丹坦言：「其實呢啲嘢以往我好少理嘅，不過今次因為有不良份子喺度大造文章，我徵詢過法律意見後，決定要以正視聽，希望啲鍵盤戰士唔好再搞咁多嘢喇。我都有同吳京講，畀佢知道有咁嘅事。（真係同吳京不和？）當年我哋拍《殺破狼》，係我出聲要求加碼500萬，拍我同佢對打嘅戲，如果咁講又點會有呢種行徑呢？（係咪從來冇睇唔起佢？）我答唔到你，點會睇唔起佢？我本身好欣賞有實力嘅人，佢用咗3年時間去籌拍一套戲，真係唔簡單。（私底下同佢係咪朋友？）坦白講唔算好熟，只係合作過拍戲。其實一個人係點，可以睇吓佢身邊有幾多朋友，當年夠傳我同黎明唔啱啦（傳二人拍攝電影《十月圍城》時不和），事實又點呢？唔係真囉。」

談到打壓吳京的傳聞，子丹比喻說﹕「唔通我同成龍、洪金寶拍戲，我畀佢哋打傷咗，又話佢哋打壓我咩？（想破吳京內地票房紀錄？）五十幾億（人民幣）紀錄好難想像，我只想破我自己嘅紀錄。」