「視帝」陳展鵬出席Clubbing裝修重新開幕活動，他表示近十年都少去夜場，細個就比較多，亦是難忘回憶：「同啲同學出去見識吓，特別係喺萬聖節同聖誕節，同埋啲朋友喺外國返嚟都會落中環玩。（多唔多艷遇？）真係冇，我係買杯酒跟住就企成晚嗰隻。」

問到身上件黑色外套是否他的戰衣，他說：「平時出活動會着，今日Clubbing活動就着得似蒲一啲。但自己出嚟玩就盡量低調啲，天氣咁熱着件Tee加牛仔褲就最好，戴頂帽同口罩，同埋依家又流感高峰期。（係咪拍拖都要咁着？）睇場合啦，如果飲宴地方咁就嚇親人。」

此外，日前有Facebook貼文笑他身上的黑色外套不合潮流，他坦言不知情：「但件衫今年㗎喎，可能個品牌比較Vintage同我着得唔好睇啦，所以我今日專登再着多次。每個人都有自己鍾意嘅嘢，如果成日跟住人着衫就冇意思。（認唔認同自己品味？）各花入各眼，潮流要慢慢『浸』。黃偉文講過『有啲嘢唔可以錯，着衫可以錯』，着得唔好睇咪下次着好啲。同埋我只係演員，喺Fashion方面唔係咁叻，希望盡量出席活動時迎合多啲。（平時女友有冇幫你襯衫？）都會，唔單止女朋友，好多女性朋友都會，我媽都係一個審美眼光好重嘅人，有時都會問佢着成點。（今日打扮有冇畀媽媽睇過？）今日冇喎，係自己襯。」