38度高溫乾煎半日　楊秀惠中暑頭暈

藝人楊秀惠到佛山拍攝無綫新劇《大帥哥》外景，要在烈日當空，38度高溫下拍攝，滋味的確不好受，秀惠更曾因為「乾煎」12粒鐘，中暑頭暈！

秀惠與張衞健、蔡思貝、曹永廉、徐榮及譚凱琪等，早前到佛山西樵山國藝影城為《大》劇拍外景，拍攝期長逾40天，由於當地天氣炎熱，平均溫度高達攝氏38度，加上每日凌晨4點便要化妝，以便趕及6點到達拍攝場地開工，難怪秀惠都指今次外景拍攝，是入行以來最辛苦一次！

大讚張衞健敬業

秀惠指炎熱天氣認真攞命，她說：「當地天氣好熱，戲服又厚又唔通風，每次拍攝出完汗，啲戲服就黏住個身，由朝早6點黏到傍晚6點，汗一直流，真係好唔舒服！好多同事都好辛苦，特別係幕後工作人員同男演員就更辛苦，因為幕後人員日日都拎住啲好重嘅器材，日曬雨淋，佢哋付出嘅汗水同努力絕對唔比演員少，男演員嘅戲服比女演員更加厚，更加密不透風，『大帥哥』張衞健，佢要喺炎熱天氣下着住咁厚嘅戲服，仲要講好長嘅對白，佢嘅對白可能一講就幾個鐘，但佢時時刻刻都保持energy，真係非常敬佩佢嘅專業！」

秀惠準備好消暑策略，應對炎熱天氣，她說：「帶咗涼茶飲，又食西瓜，劇組成日都會派綠豆沙畀大家飲，我會帶冰凍貼、風扇仔，我見有同事帶咗袋冰墊住嚟坐，用嚟降溫！張衞健就不時請我哋上佢架車涼冷氣，我唔只喺佢身上偷師演技，仲學識待人接物！無論天氣幾熱，環境幾惡劣，佢都從來唔發脾氣，對台前幕後每個人都非常有禮。」

秀惠又親述疑似中暑頭暈經歷，她說：「天氣熱，又要戴假髮，加上我好多喊戲，有一日拍到暈暈哋，我即刻同助手講我唔舒服，佢就沖寶礦力畀我補充水分消暑，又幫我搽白花油，等我集中精神。今次真係入行以來最長時間嘅一次出埠外景，我連牙膏、廁紙都帶埋嚟，每日拍攝完返酒店，真係完全冇精力再出去行，所以我將酒店房間布置到好似自己屋企一樣，我仲帶咗好多自己公司嘅瘦身、護膚產品，自用同派畀其他藝人，有福同享！」