望拍續集！何廣沛獲《男臣》帶挈賺外快

藝人何廣沛現身電視城拍攝新劇《跳躍生命線》，談及有份主演人氣劇集《超時空男臣》昨晚播出的大結局時，他說：「我要開工都冇時間睇，因為個劇反應幾好，本來係有諗過搞飯局一齊睇大結局，但因為蕭正楠、曹永廉同我都要開工，所以冇搞到。今次係一個開放式結局，唔知觀眾鍾唔鍾意？（鋪路拍續集？）聽講係想開，但監製有劇喺身，田蕊妮又話想抖吓，阿蕭同阿廉都忙，應該冇咁快。」

何廣沛當然期待拍續集：「因為我個角色係魏忠賢，如果講我返到明朝，就要做奸，我未試過做奸角，都想試吓，不過可能需要編劇動腦筋，點樣安排黃翠如呢個機械人喺古代發揮佢嘅影響力，會唔會係佢好似多啦A夢咁用佢嘅法寶呢？」

由於拍攝了《超時空男臣》，何廣沛獲帶挈賺外快，他說：「嚟緊會拍個關於飲食嘅電視廣告，詳情未知公唔公布得住，應該係《男臣》幫咗我，因為呢個廣告都係兩個星期前左右confirm（確認）嘅，可能係我喺個劇度嘅大廚形象幫咗我！（現實中煮嘢叻唔叻？）平時都有煮但唔叻，煮意粉都OK嘅！」