同男友火爆街頭　Yanny話關條頸事

組合Super Girls四缺一到電台受訪，Yanny因病缺席，講到東網影到Yanny與男友陳考威（Gareth）拍拖吵架一事，對此Cheronna解釋：「佢係頸椎有問題，所以今日嚟唔到。而Yanny同佢男友唔係鬧交，其實嗰日佢本身諗住食其他嘢，但因為真係太唔舒服，所以佢想食清湯麵，至於錶嗰度佢哋係純粹經過。」問到為何男友不陪她食清淡的東西？Jessica謂：「佢哋係性格獨立嘅人，而Yanny唔想麻煩其他人就佢食嘢。（佢哋唔會嗌交？）少啲，兩個都咁騎呢。」她們亦謂Yanny和男友感情沒有問題。

Yanny多病痛

Cheronna亦謂昨天她們有工作，本身Yanny都想一起來，但因不舒服所以要去睇醫生。Jessica亦指Yanny頸椎問題已很久：「兩年前《黑色西裝》開始，可能成日着高跟鞋彎身整親條腰。」Cheronna亦謂Yanny好孱弱，頸錐影響到頭痛，她謂：「佢尋日睇醫生話唔止頸椎問題，仲血壓過低，佢真係要調理身體，快啲好番。」問到Yanny休息可會影響她們？Cheronna表示：「唔會呀，我哋仲有4個。」此時與Yanny傳爭仔不和的Heidi終於出聲謂：「都OK嘅。」Aka就笑言騷錢除4份。

Cheronna有坐骨神經問題

講到Yanny很多病痛，Cheronna亦謂自己有坐骨神經問題，由第一首派台歌開始，她謂：「但我諗我啲肌肉多過Yanny，所以可以忍到痛，佢唔夠肌肉support筋骨先咁痛。」Aka亦謂Yanny本身有胃痛，所以食嘢唔吸收。

另外，Yanny透過電話回覆東網：「多謝關心，我頸椎出現咗問題，依家已經搵物理治療師治療，相信好快就會康復，繼續新歌宣傳。」而Yanny亦就事件有所回應，她說：「嗰日因為颱風針灸醫師冇開門，所以Gareth陪我去推拿，等我冇咁辛苦。之後係因為我唔舒服，所以食唔到米線，我就想快啲去對面食碗淨麵，快啲返屋企休息，完全冇鬧交，但我哋天生個樣都冇咩表情，所以成日畀人誤會心情唔好。至於啲錶係經過佢問我覺得邊隻靚 一齊研究吓，冇咩特別。」