港姐：被指係富家女　張寶欣咁樣講

候選港姐10號張寶欣（Boanne）於將軍澳電視城，為將於9月3日晚舉行的《2017香港小姐競選》綵排舞蹈，她表示每日都有練，可算已是熟能生巧。問到是否有舞蹈底子，她說：「我唔會覺得手腳唔協調，之前都有玩開，所以都OK。（姊姊張寶兒有冇再畀多啲貼士你？）佢都係話享受過程，冇特別講乜。反而我之前見到鄭裕玲，佢話喺台上做好自己，輸贏都用平常心面對。」至於會否找張寶兒及袁偉豪為她拉票，Boanne表示會自己在big big channel拉票。

有指Boanne的家族擁有七個禮頓山豪宅單位，問到是否富家女，她未有正面回應：「我心中富有。（單位是否你家人名下？）我唔清楚，係爸爸媽媽嘅事。我希望今次（參選）做好自己，喺舞台上發光發亮。」