黎明唱快歌有因！雷頌德被捉去夜蒲學嘢

音樂人雷頌德（Mark）與老婆梁家玉（Jade）早前作客由鄭紹康主持的奇妙電視節目《天下第一friend》。提到有不少人以為黎明由情歌轉唱快歌是拜Mark所賜，Mark聞言苦笑說：「黎明係冇人叫得佢郁㗎，所有嘢都係由佢自己出發！當年黎明去咗韓國一轉，返嚟同我講要唱快歌！我心諗：『快歌，我拿手啦！』點知寫畀佢，佢話：『都跳唔到舞嘅，聽咗都唔想郁！』最後佢捉咗我去韓國兩個禮拜！」Mark回想那段日子，日日去不同夜店觀摩，他說：「黎明要我觀察，到底播咩歌先會令人跳舞，嗰次真係一個好好嘅經驗！」

話老婆似男人

Mark讀土木工程出身，卻改行音樂路，他戲稱是怕萬一做音樂賺不到錢時，還有工作可做。正如早年他和馮德倫組成「Dry」，最後分道揚鑣，Mark笑道：「咪就係因為冇錢賺囉！個個都叫我哋去唱，但個個都唔畀錢，免費唱，喂，我件件衫都好貴㗎，冇回報做來做乜？唔好嘥時間啦！」至於Jade是模特兒出身，同Mark本來風馬牛不相及，結果因為一次拍戲而戀上：「我哋都幾同聲同氣，性格好接近，又熱愛家庭！」Mark認同說：「Jade成個男人咁，又同我一樣揸電單車！」

鬥嘴勁恩愛

問到Jade當年帶着一名兒子下嫁Mark時有否顧慮，Mark抵死地搶答說：「都咁老咯，仲有咩顧慮呀？」Jade白他眼道：「當時我得廿幾歲，你係咪想死呀！」Jade指Mark是個愛屋及烏的人：「真係唔可以唔嫁畀佢！」Mark不諱言：「我都係單親家庭長大，自細跟住媽媽，所以我好清楚Jade嘅情況，亦好明白作為一個後父嘅責任！」訪問期間，Mark和Jade不時頂嘴，但恩愛之情卻溢於言表，Mark笑道：「唉，我哋日日都嗌交㗎！」Jade補充說：「我哋冇隔夜仇囉！」Jade和Mark婚後再誕下二子，作為三子之母，鄭紹康大讚Jade保養得宜，依然好「得」，Mark在旁搞爛gag說：「佢好得，因為佢嫁咗畀雷頌德！」