減磅開個唱叫苦!湯寶如望學友做嘉賓
入行25年的歌手湯寶如(湯記)將於11月15日假九展舉行《湯寶如獨愛音樂25週年演唱會香港站》。她露出香肩為演唱會拍攝海報,透露今年沒想過開騷:「唔想搞嘅原因係攰,要搞好多嘢,同埋唔想畀人知(入行)幾多年,尤其係女人,男人就唔緊要啫,但主辦商勸服咗我,所以我都OK。」
嘉賓方面,湯記不想邀請一些大家都會猜到的藝人上台:「當然有啲好朋友一定會請,例如黎瑞恩,但其他嗰啲就喺下面坐,得閒就上嚟玩。」她亦謂其實年底搵嘉賓好難,因為各自有活動要出席:「年尾大家都忙出去搵錢。」
努力重組《美少女戰士》
講到之前跟王馨平在無綫節目《流行經典50年》合唱《美少女戰士》主題曲引起很大回響,但上次獨缺周慧敏,問今次三人可有機會合體獻唱此曲?湯記表示:「要睇吓大家時間啱唔啱,時間啱就梗係會請,但唔啱都冇辦法。」
但她坦言最想請到的嘉賓其實是歌神張學友,原來除了頒獎禮及寶麗金群星演唱會外,兩人甚少在香港公開場合唱過《相思風雨中》:「上次20周年演唱會嗰陣佢唔得閒冇嚟到,但今年佢又忙做Tour,所以真係好難嘅事,但真係希望搵到學友做嘉賓。」
支持關淑怡開展新生活
造型方面,湯記表示會行型格路線。問可會性感上陣?她說:「會有少少,如果唔性感少少你哋唔收貨。(最有信心露邊度?)背脊啦!」她亦透露要為個唱Keep Fit,現時已開始吃蔬菜生果餐,真係好辛苦:「冇味,連叫檸檬茶都要走甜。(頂唔順?)慢慢嚟,已經瘦咗啲,目標想減到110磅,同埋要多啲做運動練氣。」
另外,講到好友關淑怡早前承認普通襲擊罪而被判罰款二千元及留案底,她表示:「冇特別搵佢,唔想騷擾人哋。(依家冇乜聯絡?)少呀,我都唔清楚佢判決結果係點,但點都好,做朋友都會支持佢,希望佢重新開始生活,開開心心就得啦,最緊要開心。」