國語碟籌備4年 薛凱琪預告親自執導MV

20170906
東網電視
更多新聞短片
等咗4年終於等到喇!
歌手薛凱琪(Fiona)到電台宣傳錄了4年的國語大碟《You Make Me Feel》,指愛情能帶來不同感覺,又笑言錄得比Michael Jackson還久,而第一首派台歌《520》是我愛你的意思:「主題係非誠勿擾,我覺得同朋友就個個都可以講我愛你,但愛情上就唔可以亂講,喜歡同愛好大分別,係一首開心嘅快歌。」拍攝MV時,她找一班男舞蹈員反串穿婚紗、泳衣,自己就穿西裝和魚網絲襪:「搞笑跳舞嘅。首歌方大同寫,好多謝佢,好多人都好驚訝佢會寫咁女仔同Sweet嘅歌。」Fiona讚對方很熟悉自己的聲音,但錄到第三年時對方亦開始為她着急:「佢問我隻碟出未,使唔使幫我計劃幾時打歌,依家仲爭一隻,好難夾到期錄音。」
訓練「萬能」助手
她表示有想過出國語EP,但答應了歌迷會出大碟:「好感動公司好錫我,冇催我。」她會執導3、4隻歌曲的MV,但坦言很攰,因為自己甚麼都做:「我已經訓練到助手識剪花絮。(加人工?)加咗,我好嚴謹,通常佢剪嘢我Tune色,Re-edit 3、4次。我會放佢幾日假去學嘢,做我助手真係好抵,邊間公司會畀錢、畀時間你學嘢?有日我夢見助手幫我整頭,之後佢話『你諗都唔好諗,我可以做到幾多嘢?』」
預告拍網劇
Fiona透露10月開始拍網劇,已近7、8年沒拍過:「拍3個月,但都會盡量做碟嘅宣傳,我個新助手都問點解可以咁忙。」她坦言以前曾埋怨忙碌令身體不好與心情緊張,又沒時間玩或見識世界,而近兩年她學會了打坐:「點攰都冇埋怨,學識咗所有嘢都係自己揀,活得快樂好多,可以做更多嘢。」提到日前與黃柏高(Paco)開會,她指對方叫自己放鬆:「我話唔得㗎,我係我嘅生意。我做導演拍MV,見到地下有污糟嘢,我衝出去執同拖地,因為作為最緊要嗰個可以感染到人哋有動力,唔係壓力,跟住Paco個樣呆咗。」