沉迷打機　容祖兒自爆玩到險盲

天后容祖兒出席完「英皇電競」成立記者會。接受訪問時，祖兒自爆打手機遊戲打到雙眼險些盲，她說：「打到差啲盲要停止打機，直情睇嘢朦同冇焦點，曾經沉迷到畀錢買手機遊戲，有時見成個禮拜冇使錢，咪畀二百蚊買幣，不過最多都係用四百蚊，都會幾節制。」問到有否打到青光眼？祖兒說：「睇嘢冇焦點，平時睇遠嘢好清，突然好朦，會停止打機一個星期。（有冇睇醫生？）咁又唔使睇醫生，抖一抖就得。」

問到會否與男友劉浩龍一齊打機？祖兒笑笑口說：「唔講你知。（男友鍾意打足球機？）唔講你知。」對於好友謝霆鋒曾試過掛住打機唔沖涼及唔洗頭，抵死的祖兒笑說：「廢寢忘餐，佢打到腳指甲伸晒出嚟同綑晒黑邊，講笑啫。」