Ella陶子興奮大叫！黎明搵明福俠教煎蛋

內地節目《蒙面唱將猜猜猜》嘅前身《蒙面歌王》，曾經搵過歌手李克勤坐鎮，當時戴上面具但不改唱腔嘅克勤，高歌時竟然連老友巫啟賢都認佢唔出，即成熱話！ 尋晚播出嘅一集，就有另一位天王級歌手加盟節目，自稱「煎蛋俠」嘅佢無論衣着、打扮、唱腔，仲有戴埋「明福俠」個面具同大講金句，真係橫睇掂睇都似係「明福俠」黎明（Leon）囉！ 「煎蛋俠」甫出場孖住兩個蒙面人合唱，見佢哋又唱又跳內地小鮮肉男團TFBOYS嘅歌曲《青春修煉手冊》，令現場觀眾非常High！之後「煎蛋俠」再唱出《遇見》，甫開口已經呼之欲出，最終亦揭曉「煎蛋俠」就係Leon，一眾嘉賓都勁驚訝！ Leon喺台上講番參加節目嘅原因，就係覺得好玩同埋想學習吓，佢仲自爆係TFBOYS嘅小粉絲，難怪會揀咗三個小朋友嘅歌啦！ 至於點解叫自己做「煎蛋俠」呢？Leon解釋，自己打算表演煎蛋，咁點解會揀煎蛋嚟表演呢？原來Leon以前喺英國讀書時，成日會整煎蛋做早餐，身邊嘅朋友都大讚好食，於是佢想展現自己真實嘅一面。佢仲分享煎蛋三大秘訣，就係皮薄、底脆、蛋白同蛋黃保持喺40％嘅熱度，大家記得跟住黎明嘅烹飪絕技煎蛋喇！ 而身為評判S.H.E的Ella（陳嘉樺）雀躍地說：「不敢相信自己的眼睛！」至於另一評判陶子（陶晶瑩）更興奮莫名。