男友融入家中　譚凱琪預埋屋企人過中秋

藝人譚凱琪（Zoie）以露肩裝出席中秋節活動，在現場即席製作兔仔燈籠。問到中秋節會否與男友二人世界，她說：「唔止兩個人，我比較傳統，會想叫埋屋企人一齊打邊爐又好，燒嘢食都好，鍾意一家人好溫暖嘅感覺。」同時認為現時人大了，而家姐又有小朋友，會屋企人行先過朋友：「會想多啲時間同屋企人相處，啱啱又忙完《大帥哥》，都想去玩吓，出去走走咁。」講到最難忘的中秋節，Zoie表示在幾年前到比利時工作：「嗰時拍旅遊節目，我同成班制作人員咁啱一人帶咗個月餅，砌夠一盒，又喺當地買啲生果一齊賞月，好似一家人咁。但呢啲節日特別掛住屋企，尢其人在異鄉，感受大啲。」

Zoie透露年底會與《少婦聯盟》幾位成員，包括龔嘉欣、陳凱琳和沈卓盈拍攝旅遊節目：「地點仲未Confirm，我諗我哋四個女仔去邊都咁開心，十二月咁凍或者會浸吓溫泉，同埋滑雪都開心。我哋都會做定資料搜集，想去邊就Sell吓，日本之前都有去到，但東京好耐冇去，所以好興奮，可以兌定日圓。」