由細唱到大！陸寶升呢做歌手靠巨星撐住

歌手陸寶本來是演唱會監製，成為歌手他覺得是無心插柳柳成蔭：「我由幼稚園已經入合唱團，一路唱到中六冇停過，好多次香港校際音樂節都幫學校攞獎。1977年我參加咗香港業餘歌唱比賽，即係新秀嘅前身，攞咗國語組亞軍。之後去咗美國讀書，入大學頭兩年都喺合唱團唱歌，畢咗業喺當地做嘢，1986年參加全南加州卡拉OK歌唱比賽攞咗第一。返到香港做嘢，機緣巧合遇到黎小田就入咗呢行做幕後。2012年我做胡美儀演唱會監製，綵排嘅時候畀風行唱片嘅Mimi同Andy聽到我同樂隊Jam歌，就話要同我出碟。」

陸寶指Andy的爸爸是香港唱片商會永遠名譽會長林耀，很感動得到林耀的讚賞：「佢話我把聲咁好，一定要將佢留低，所以2014年就出第一隻碟《細聽…陸寶》。」他坦言曾經被潑冷水，幸好只是在出碟前，出碟後所得的評價都很正面：「唔好理年紀，只要有堅持、努力同實力，有朝一日都可以喺唔同途徑話畀人聽自己做到。」在陳潔靈介紹下，陸寶與拍檔到義工中心教60歲以上的老人家唱歌，組成風行合唱團，至今已8年，陸寶說：「我好記得當年羅文叫我唔好灰心，話幕前唔要我，我就喺幕後將最好嘅嘢做到最好為止，但一定要Keep住自己最鍾意嗰樣嘢，有朝一日畀番人睇。」提到當年到美加工作，陸寶指他們在旅途上無所不談：「佢影響咗我好多，令到我對自己嘅信念堅定不移。（成日同歌手朋友傾訴？）我唔係鍾意攞出嚟傾嘅人，但陳潔靈同葉麗儀好叻，會發覺到我唔開心。」

至於新碟《愛聽陸寶》，陸寶形容歌路比前兩隻碟闊：「以前唔係好夠膽唱張學友嘅歌，但今次我揀咗Hi-Fi界要嚟試聲嘅《怎麼捨得你》。另外，因為當年幫張國榮做嘢，所以我好少公開唱譚詠麟嘅歌，費事大家覺得奇怪，但今次我就重唱佢嘅《忘不了你》，同埋一首好難唱嘅歌，就係葉德嫻嘅《不再分離》。仲好好開心重唱咗張國榮嘅《紅顏白髮》，仲畀今年Hi-Fi騷揀咗落入場碟，英文寫住『The Perfect Sound 2017』，係好大鼓舞。」問到可有興趣與年輕歌手合作？他就大讚Gin Lee歌路闊，願意嘗試不同歌種。