追女必學！BabyJohn四首金曲冧香香

一生中點都會遇到個好鍾意嘅人，不過要開口同鍾意嘅人表白，都唔係一件容易嘅事。唔少人都會送禮物或者寫封情信畀對方，不過呢啲方法，似乎好難令對方印象深刻。無綫嘅官方facebook專頁「See See TVB」，就剪輯左一段尋晚播出集《老表，畢業喇！》，當中飾演史德華嘅BabyJohn（蔡瀚億）就畀咗一個方法大家。喺劇中，佢就向飾演柳妞嘅岑麗香表白，為咗令香香公主留下深刻嘅印象，BabyJohn決定以四首經典金曲憑歌寄意。一班網民睇完話佢識揀歌，夠入肉，仲大叫：「我都要去表白呀！」

BabyJohn一嚟就對住香香公主唱陳百強嘅經典金曲《有了你》：「有了你自覺開心風趣，太快樂，每一刻都想見你」，而且佢仲拎咗個水樽扮咪，認真搞笑。不過香香公主未被感動之餘仲畀佢嚇到眼都凸埋！BabyJohn仲話驚係自己一廂情願，所以就唱麥浚龍嘅《沒有人》：「從來沒有，從來都沒有，纏綿邂逅，完全虛構」又真係唱得幾好喎！

香香公主睇住佢用唱歌嚟表白，不知幾咁尷尬，唔識睇人眉頭眼額嘅BabyJohn話無論如何都要同香香公主表白。之後佢仲引用郭富城嘅《愛的呼喚》話香香公主嘅聲音喚醒佢心中嘅愛火。BabyJohn話如果香香公主唔接受佢嘅話，佢就會「眼紅紅」，點解？因為佢唱咗Twins嘅《眼紅紅》：「我最初面紅，現在雙眼通紅」雖然呢種表白方式真係好有新意，不過企喺一邊嘅欣宜就忍唔住叫佢收聲，仲話：「你再唱落去，我真係打到你眼紅紅！」唔少網民睇完都話笑爆嘴，仲話如果真係遇到啲咁嘅人，一定會掉頭走。

網民有話兒：

Pxxe Sx：你收聲！唔好再唱呀！！！！！

Sxxxn Lixx Wxxx： 我唔理喇！！ 我今日就要表白。。。。。。

Sxxar Lxxxg ：變左（咗）另類串燒歌，想繼續聽埋落去。。。。。。

Yxxi Yax Kxxx：輕輕叫喚我果（嗰）度笑到我就死XDDDDDDDDDD