美女廚房！高海寧湯洛雯鬥「死蛇爛鱔」

無綫綜藝節目《美女廚房》當年口碑和收視成績都非常理想，近日無綫將節目轉移至big big channel進行直播，日前第二集就搵湯洛雯（靚湯）同高海寧（高Ling）挑戰廚藝，即場以鱔做材料，自行發揮炮製一道美食。兩位靚女未開始煮，有網友就話：「靚湯嫁唔嫁得出睇呢次。」<br/><br/>開始時，靚湯同高Ling攞條活生生嘅鱔出嚟時已經嚇到?嘩鬼叫，二人雞手鴨腳。靚湯斬鱔時仲要搵主持林盛斌（Bob）幫手：「我有煮過嘢食，但唔係鱔。」而高Ling的劏魚技巧就有板有眼，她謂之前拍劇集《愛情食物鏈》時學回來的，仲講笑同Bob講：「以為你食好多，你生咁多個。」<br/><br/>而與羅天宇「發展中」的靚湯，被阿Bob將戀情擺上枱，問到有否為愛人下廚，靚湯就顯得不願講感情事，只係話父母都未試過她的廚藝。原本打算蒸鱔的靚湯，突然改為炒鱔，期間她更將茄汁倒落鑊中，即刻被阿Bob取笑她煮「咕嚕鱔」，仲笑她將鱔煮到溶溶爛爛：「死蛇爛鱔咪呢啲囉！」<br/><br/>二人完成後便為作品改名，靚湯嗰碟叫「靚湯甜酸very good鱔」，雖然睇落色香味俱全，但阿Bob、陸浩明同飲食主持馮嘉橋試完即刻嘔番出嚟。至於高Ling的「米嘟蓮車胎鱔」，初時被阿Bob指有陣臭味，連高Ling都叫大家要準備水，但眾人試過後竟然話味到不錯。結果高Ling以23分，成功擊敗只有5分嘅靚湯。