險當眾甩褲　張敬軒自爆為演唱會剃毛

王菀之（Ivana）跟張敬軒（軒仔）這對超強組合再度合體，昨晚移師到澳門演出，今次他們的造型有部份是全新設計，軒仔在台上自爆為了穿一條很窄的褲要剃腳毛，他笑說：「係呀！我今日冇晒啲腳毛，為咗呢條褲我花咗成個鐘剃晒啲腳毛，因為條褲好窄身又多拉鍊，經常夾到啲腳毛，所以要剃光腳毛！不過講剃腳毛都有掌聲，相信我都係第一人！」此外，二人又落台與觀眾握手，不少觀眾爭相擁到台前搶握手位，在演唱會近尾聲時二人更一時感觸來個情深擁抱！

借機笑王菀之肥

在演出期間軒仔險些當眾甩褲，幸而Ivana醒目為軒仔擋着，好讓軒仔弄好褲頭再演出，軒仔笑說：「當時我唱唱吓歌，突然聽到條褲『啪』一聲，條褲好似鬆咗，幾驚甩褲呀！」在旁的Ivana插嘴說：「你咪賴條短褲，之前你着係鬆，而且窄咗你坐低唱歌我都聽到爆線聲，好在我遮住你。」軒仔乘機反駁Ivana說：「你點止遮住我，成隊BAND都畀你遮到啦。」另外，軒仔在握手環節時被人搶咪，不慎撞傷嘴唇，他笑謂因為有人想搶他支咪，他覺得支咪比他更重要，所以角力下撞到嘴唇。

今次演唱會他們的造型有部份是全新訂造，Ivana亦換上一頭短髮，軒仔笑指二人近日的體形上有些不同，因為大隻咗！Ivana說：「我大隻咗係因為健身，其實喺二月香港站演出時候，係近新年期後時間，我已經開始戒口，我應承所有設計師唔會大食，不過我就由紅館完騷後食到依家，所以我減唔切，今次澳門站係中秋節期間，我又食咗好多月餅！」而軒仔則自言大隻在下半身！令手多多的Ivana偷襲拍打了軒仔的肚腩一下！軒仔又表示，今次大家演出的狀態很理想，他們希望能繼續有其他地方巡迴演出！