Cheronna@SG新戲險被姦　滾水淋淫魔

組合Super Girls成員吳嘉熙（Cheronna）在元朗出席ViuTV新劇《Plan B》開鏡拜神。提到男友「夏雨仔」黃奕晨（Dixon）冇份參演，她即謂：「唔係我決定嘛！希望之後有機會合作！不過今日都學到好多嘢，因為所有演員都好有經驗，同埋個角色對我嚟講都好大挑戰，因為同我本人係相反。」提到戲中會被駱振偉（Thor）意圖強姦，問男友會否監場，她即謂：「佢同Thor都好老友，所以唔擔心。（可能私下打佢一身？）有場戲我要用水淋Thor，我男友就講笑話叫我換滾水淋佢。」又笑指Thor有邀請Dixon探班：「睇吓佢肯唔肯，我自己叫就未必肯嚟。」

提到隊友李靜儀（Heidi）自爆疑有情緒病，問男友有否跟她分享情緒問題，她即謂：「男友絕對冇呢啲問題。我覺得大家都有工作上嘅壓力，都想有靜嘅時候，所以都會畀大家空間，想傾就傾，唔好睇小情緒問題。」