試過面懵轉行被認出　麥貝夷靠北上翻生

歌手麥貝夷（Karene）於2011年與鍾一憲組成情侶檔，並憑合唱歌《勾手指尾》成名，但2013年跟前唱片公司結束合約後，一度進入迷茫期，直至早前以素人身份參加內地歌唱節目，她才再度備受注目。Karene自言不是一個圓滑的人，曾反思是否適合做藝人：「完約後有試過做傳媒公司同廣告公司，之後做工程公司文員，好尷尬，啱啱仲係《勾手指尾》時期，同事會問：『點解你喺度做？』又冇得同佢哋講做藝人好窮，當時做咗三個月頂唔順，因為我排解唔到佢哋個疑問，又有個同事問我識唔識一個牌子，我話唔識，佢反應話係：『吓？』，藝人光環冇咗之後，唔知點解我變成一個問題，之後諗不如做番藝人。」但這段時期亦令Karene學懂如何面對壓力。

問朋友借錢

其實Karene一直有增值自己，花錢學唱歌學演戲，惟家人也試過叫她放棄：「佢哋好擔憂，叫我唔好做，心痛我，但我聽落變咗打擊嘅說話，身邊朋友亦唔明，我用好多時間睇書，啲人會問我忙咩？覺得我白忙，學費又自己畀，點解付出金錢同時間，但冇收穫？但我覺得只要我堅持，就會有回報！最差時試過問朋友借幾萬蚊，朋友願意借，真係好拮据。」Karene坦言完約後欠下卡數：「收支平衡唔到，唔可以供任何嘢，如果有一個月大使咗就會累積落去。」

目標做業主養家

幸好Karene堅持下去，如今在內地知名度大增，她希望日後有機會接拍內地劇，又直言因節目效應而工作量大增：「Online工作多咗，每次開直播都好多人睇，呢個係起步，收入幾好，媽媽都滿意，不過賺錢係無窮無盡，希望更加好。依家未買到樓，希望之後可以買到一個舒服Size嘅單位畀屋企人。」

場地：老鍋台式火鍋