張智霖不忍仔仔踩板撻生魚　虛心請教高人

最近忙於拍攝新戲的張智霖（Chilam），日前趁有時間就化身湊仔公，駕車陪仔仔魔童到灣仔一個公園內的滑板場玩滑板。魔童初時捉住Chilam隻手借力練習平衡，而Chilam則全程視線不離地傍住他。

之後，魔童開始練習滑板花式，過程中少不免跌跌撞撞，而慈父Chilam亦只好上前安慰及拿飲品給仔仔喝以補充水分。不過，唔識踩滑板的Chilam由於唔忍心見到仔仔成日「撻生魚」，於是硬着頭皮主動帶仔仔去請教現場一位哥哥。哥哥即場好心示範及講解，魔童就在旁專心聆聽。在高人指導下，魔童再自行苦練，期間亦唔小心跌倒，雙手即摸住膝頭，表情痛楚。魔童跌多幾次後，終於「開竅」成功掌握做到花式動作，並興奮地同爸爸分享喜悅，而Chilam就好開心咁望住仔仔。兩父子玩足兩小時才捨得離開，Chilam搭晒膊頭去取車，至於撞到手腳都傷晒的魔童沿途則不停捽住隻手肘，之後齊齊回家。

另一日，媽咪袁詠儀（靚靚）就單拖前往銅鑼灣超市買餸，不一會，她已挑選購了一大堆餸菜前往排隊付款，當中包括果汁、鮮奶、乾糧、泡菜、肉類及調味料等。靚靚更力神上身，親自拎住兩大袋戰利離開。臨走前，一位女士不慎把購物籃整跌落地，靚靚即上前出手幫助幫對方執起購物籃，完美示範「助人為快樂之本」的精神嘛！