陳慧敏麥花臣開騷　全憑一股傻勁

歌手陳慧敏為11月1日於麥花臣場館舉行的演唱會積極準備，坦言感受到身邊工作人員平時有多辛苦，亦體驗到團體精神。對她來說，宣傳和安排人手是最困難的部分，沒想過要做這麼多。問到男朋友可會來捧場？她笑言：「想試我？會有好多男性朋友嚟睇。（男朋友嚟唔嚟？）有嘅話佢會嚟。（單身？）係呀，好陰功㗎。」提到她親自填詞的歌曲《我們叫傻瓜》中的歌詞「我男朋友話我似洗衫板」，她否認是事實：「洗衫板就見仁見智啦，呢件事唔係真係發生過，不過太多朋友咁形容我，我就將呢種感覺寫落歌詞，好多身材平平嘅女仔都會遇到呢啲事情。反而以前同我相戀過嘅人就冇咁講過，就算佢哋咁諗，都未必會咁講，算係好彩定唔好彩？」

演唱會以《我們叫傻瓜》為主題，除了因為陳慧敏給人「傻傻哋」的感覺，還想表達對於喜歡的事那份熱愛和傻勁，她說：「未必好精心策劃去考量，真係為愛而愛，我參加《超級巨聲》都係，我冇由細到大瘋狂受訓，冇話要做明星或Michael Jackson接班人，只係不嬲好鍾意音樂同唱歌。」她感激這機會讓自己踏上舞台，感受到音樂的價值，找到喜歡做的事，慢慢去進步和突破自己。她認為很多人都有這份傻勁，例如演唱會海報中的香港運動員：「當年『牛下女車神』李慧詩嘅教練問佢幾時可以參加單車培訓，佢話隨時都得，跟住教練話聽日，咁佢就踏上咗運動員嘅生涯。好得意，好多人都未必咁有計劃，但真係憑住熱誠同愛，一步一步實踐同成就想做嘅事，嗰份精神同勇氣好有力量。」