女神唔識忍笑 盧峻峯爆劉佩玥拍片喪NG
無綫藝員譚永浩(Jarryd)、盧峻峯(阿盧)和董敬文(TT)近年除了參與幕前演出,三人更建立《喂霞姨》的Facebook專頁上載搞笑和唱歌短片,成為網絡紅人。他們早前誠邀兩位「宅男女神」陳瀅和劉佩玥一同拍攝名為「那些年我們一起追的陳瀅」的短片,除了當時陳瀅為萬能Key成為熱話,加上兩位女神坐鎮,當然吸引不少網民關注。問到與兩位女神合作當中有何趣事?阿盧大爆劉佩玥忍笑能力非常差:「同佢做對手真係好辛苦,要NG好多次,當你好認真咁同佢講一句對白,佢都會笑,有時都未開聲,淨係行埋去都已經笑。」
Jarryd則爆出邀請陳瀅合作時的過程相當搞笑:「當時我諗住好causal咁問佢有冇興趣一齊拍段片,因為我哋都係非商業性質,點知佢問我可唔可以錄段音畀佢經理人,我仲心諗咁official,最後我好認真send咗段錄音講個拍攝細節內容畀佢經理人,不過最後佢都講笑話唔使咁詳細,都只係想畀經理人知道咩事。」他們亦坦言感激兩位女神的幫助,令整段片生色不少。
他們的短片每次都深受歡迎,問到會否因而增添壓力?TT指大家期間曾遇過一度的迷失,全因希望每次都能給予網民新鮮感:「我哋都想求進步,會諗唔同方向點拍好,但係愈諗愈亂,大家有時都會迷失咗,不過最後其實大家慢慢諗清楚,就知道大家個方向最緊要有音樂同可以令人開心。」
場地提供:Ocasa Cafe & Restaurant
鳴謝:Barry@J&B Ent