宣傳新劇加出碟　胡鴻鈞忙爆冇得打籃球

歌手胡鴻鈞（Hubert）日前出席青少年籃球活動，問他可是籃球高手？他表示：「唔好咁講，但籃球係我最鍾意嘅運動，我小學四年班開始打，依家都有同吳業坤等好友組成球隊，定時定候都有打，之前都有玩比賽，但最近忙啲就冇時間。」問他讀書時期打籃球可有引死不少女仔？他笑言：「我中學嗰陣讀男校。（但通常識打波會受女仔歡迎？）呢個應該用唔到喺我身上，不過都冇話想識女仔而打籃球。」

講到工作，Hubert表示稍後有兩套劇集上映，分別是《降魔的》及《誇世代》，所以之後要忙於為兩劇宣傳，而年尾亦會出碟，現時已錄得八八九九。至於講到好友吳若希終於榮升何太，問到可有送上甚麼祝賀禮物？他表示：「我嘅祝福就係大禮，我都想去澳門探佢同佢BB，其實之前探過一次，但BB大得好快，為免佢唔認得我呢個叔叔，所以諗住定時定候探。（下次幾時去？）要等大家冇咁忙先，佢都開始出番嚟。（係咪都戥佢做媽咪同人妻開心？）的確見佢開心咗，雖然有時都見佢有壓力，始終佢老婆同媽咪嘅角色啱啱開始擔任，所以作為佢朋友會支持佢。（咁幾時到你成家立室？）我有排啦，唔諗呢啲住，工作先。」