狂数翠如七宗罪　洪永城冇胆全裸攻影坛

洪永城与黄翠如相识超过十年，可谓新一代萤幕金童玉女，但洪永城却笑指对她的“不满”随日月增加，更力数黄翠如的“七宗罪”：“智商同十几年前比都冇变过！”而在公仔箱形象入屋的他，坦言希望开多瓣闯影坛，更指之前与露肉演出失诸交臂：“《一路向西》都搵过我！”

“结婚”满足集体回忆

相识超过十年的艺人洪永城（Tony）与黄翠如，Friend过打Band似好姊妹更似好兄弟。有一班网民觉得他们是天生一对的金童玉女，更有人写下《每个男人心里都有一个黄翠如》这篇流传一时的网络潮文，“歌颂”这段不能开花结果的感情。这对最佳拍档在旅游节目中出双入对，至今年初无綫播出的剧集《我瞒结婚了》中，终于饰演一对情侣令网民“圆梦”，Tony笑说：“满足到大家嘅童年回忆，个个都由细睇到我哋两个嘅旅游节目大！如果可以带到啲好嘅回忆，同好嘅感觉畀大家，始终呢种系一种存在喺心入面嘅美好感觉，有时释放出嚟都几好。”问会否想再合作？他却笑说：“黄翠如咁有钱，佢好有可能唔做，真系可能冇机会！”

拒做楼奴恨移民

虽然Tony好庆幸与翠如携手炮制过大家喜欢的节目，更谓希望继续拍落去，但最近他就“卖甩”翠如，一个人走去拍旅游节目《退休地图》，更被对方投诉“被飞起”！Tony笑说：“唔系啩，佢每日都几组戏喎，咁都要夹啱时间、地方先可以做到嘅。”在节目中走访哈萨克、马尔他、哥斯达黎加等国家，他亦指想过另类生活，不想完全困在香港被楼债“奴役”：“其实可以喺世界各地有唔同嘅生活方式，唔系一定要喺香港做一个楼奴，我哋其实系有选择。”

问到会否想移民一走了之？Tony坦言曾想到台湾落地生根：“但我去完哥斯达黎加之后，都好想移民去嗰边，嗰边真系好Chill，冇咩竞争，好平和。（唔买楼？）都需要嘅，但觉得楼价过高，好难可以上车。（有储首期？）咁一定有嘅，但好似过一阵楼价又升，又要畀多十几廿万，我谂冇一个地方咁荒谬。睇报告都话全世界最高楼价系香港，冇晒生活。”他更指透过今次节目知道二百万港币就可在马尔他买一幢三层高的临海小古堡：“我哋喺香港辛苦供廿年，可能都系得四百呎，系咪好似有啲唔甘心。”

唔抵得人哋有钱

Tony与翠如私交甚笃，除非常清楚互相的优点，更十分了解对方的缺点。讲起翠如的缺点，Tony即列举她的“七宗罪”：“佢最大罪系靓，最衰就系太靓，同埋太Pure，我估唔到佢咁多年之后都仲Keep到，佢同十几年前比都系冇变过！例如智商！”不过他之后都补飞大赞对方的纯真能令身边人处于舒适的状态：“佢令身边嘅人都好开心，只不过系佢有时太忙，思绪、谂嘢可以再好啲。（有话过佢？）有提醒过，但呢个可能系佢嘅个性，佢系好坚持，但佢知道自己做咩就得㗎喇。”之后Tony更笑住数翠如其他罪行：“我唔抵得佢男朋友（萧正楠）唱歌好好听！我唱歌就唔得喇，有试过嘅，但唔系好好。我希望可以喺音乐同跳舞上面发展。”问会否憎她“有钱”？他笑说：“唔止憎咁简单，嗰个层次好复杂！”他更笑住数她衰脚长，但筋骨硬及大鼻，认真搞笑！

冇身材做“鸭王”

提到Tony在旅游节目和剧集上，就算未称得上略有所成，都可以叫做非常入屋。问他会否想趁机闯影坛？他说：“其实我都好想试新嘢，但系电影圈对我嚟讲好陌生，唔知点样可以入呢个圈子。（邵氏都有开戏。）都唔排除呢个机会，如果有机会拍到电影，学到嘅嘢都可以带出嚟，其实全部都系演艺上相辅相成，好希望有咁嘅机会。”问他是否试过错失开戏机会？Tony说：“唔可以话系错失嘅，系咁唔夹唔到嗰个机会，其实有好多套搵过我，但系突然间度唔到期。（最爆边套？）真系要讲？曾经《一路向西》个导演都搵过我，叫我演一个几重要嘅角色，当时都讲得好清楚㗎喇，唔会系水我，系要除衫，系要裸，露晒，但系我话我相信我做唔到。”更笑指自己一来没身形，二来接受不来：“虽然都唔使身形！（做‘鸭王’得唔得？）要好弗㗎！”

服装：Lane Crawford

场地：Waalah