受城城啟發！排舞師麥秋成跳勁舞致敬

啱啱榮升爸爸嘅天王郭富城，舞藝了得，多年仲稱霸整個「舞」林！相信唔少人都係聽住城城嘅歌大，其中排舞師麥秋成就係其中一個！麥秋成唔單止聽到大，佢日前仲喺社交網上載條短片，話因為城城所以佢先接觸舞蹈，而家仲成為排舞師，喺內地爆紅嘅陳偉霆代名作《Taxi》嘅舞步，都係由麥秋成排㗎！

呢條短片麥秋成將城城嘅跳舞金曲由八十年代跳到而家，麥秋成同幾個朋友一齊跳，跳舞多過食飯嘅佢哋，唔單止舞步齊仲力量十足！除此之外，麥秋成連造型都係落足心機，好似麥秋成跳《對你愛不完》時，就特登着件大褸增加復古味！之後跳《唱這歌》時又特登搵件藍色外套配合番當時城城MV造型。最令網友尖叫嘅，梗係麥秋成跳《鐵幕誘惑》時除咗戴黑超之外，連後面機械人舞步都一一呈現畀大家睇，真係落足唔少心機，絕對無悶場！

呢條片上載唔夠兩日，已經吸引超過兩萬人睇過，原來麥秋成話只係用咗二日時間，仲要通宵咁去拍，後面仲有少少洋蔥位，就係見麥秋成上載同城城嘅合照兼留言「謝謝你的啟發！」嘩，又可以實現夢想又可以同偶像影相，真係唔係人人做到，唔少網友都話好感動。

網民有話兒：

Kxxxrisu Rixxn：好感動

Raxxel Cxxu：好有心喔！真感動

Jefxxxy Hx：跳得很好，很用心的編舞！讓我重溫中學時代開始迷的舞台皇者！每首歌都識唱。

Exxxa Chxxg：看得出來結束跟開始的畫面，是精心設計過得，好有心。