同假男友談情 星座少女晒長腿熱到暈

20171030
東網電視
更多新聞短片
星座少女今次MV要同「假人公仔」做對手戲。
跳唱女子組合「星座少女」(Staries)日前為新歌《男孩子們》拍攝新歌MV,早前四位成員Emma(潘小環)、Poyiu(黃寶瑤)、Cman (李善敏)及Cecilia(易佩詩),連月來接受特訓操肌和練舞,而近日該MV正式推出。MV中星座少女換上三個造型,分別代表可愛、型格及性感,藉此帶出星座少女不同的一面。
直踩20小時
為了今次的MV拍攝,Staries特意於屯門一空置船廠內取景,更由早上開始直踩20小時拍攝。對於處女MV出來的效果,四位成員均表現興奮:「當日拍攝咗好長時間,係近乎跳咗一整日,當時冇刻意去睇拍成點,反而專注跳舞方面,所以都好期待MV推出,依家睇到努力嘅成果,真係好開心。」
密室拍攝險焗暈
隊長Emma直言今次的MV「有血有淚」,她表示:「由於拍攝時正值炎夏,導演又選擇咗喺密室拍攝,加上燈光,真係好熱好焗,起初我都有啲唔舒服,都擔心會焗暈,好彩拍攝順利,而我哋每當拍攝有空檔,都會入化妝間過冷河,因為得嗰度有冷氣!」
唔捨得假男友
對於今次MV要跟「假人公仔」做對手戲,四位成員笑言拍攝前都有跟「對方」培養感情,Cman表示:「公司之前話今次MV男主角係一個假人,仲叫我哋要跟佢培養感情,我哋聽到笑唔停,不過依家我已經同佢感情深厚,拍攝完仲有啲唔捨得佢!」Poyiu坦言拍攝時為求代入角色,勾起過往談戀愛時一些被男友冷落的不愉快經歷,更笑言把假人當成「仇人」,至於未曾戀愛的Cecilia則於MV中享受拍拖感覺,她說:「感覺好奇怪,只有我講,而假人又點會理我,自己似個傻婆咁,不過算係拍過拖囉。」