出道十年回復自由身　洪杰望發揮小宇宙

歌手洪杰（Alex）到尖沙咀出席首映禮，他透露正籌備於銅鑼灣一間唱片舖舉行小型個唱：「個期仲未傾掂，但應該七七八八。」回復自由身的Alex，被問到有何打算，Alex說：「都係喺香港做住先，因為喺前公司有好多嘢都要經過公司，有好多可能自己未發揮到嘅機會，所以希望以前一直未表達到嘅嘢，依家去表達出嚟畀大家睇。我2007年參加新秀，十年嚟心裏面一直有好多嘢想做，希望依家未有公司就未有限制嘅時候盡量發揮。」他謂想嘗試拍音樂劇，但自己未有太多演戲機會，看看現在有沒有多些演戲機會，並可以向內地發展。

Alex又謂有其他公司向他招手，但暫時未有決定：「想睇吓自己自由身可唔可以做到啲嘢。有公司等於有某程度上嘅限制。趁依家自由嘅日子，睇吓自己去到乜嘢程度。」