「絕世好女友」唐詩詠約西裝男睇戲撐枱腳
20171106
東網電視
更多新聞短片
真係有着落！
現年36歲、有「絕世好女友」之稱的無綫花旦唐詩詠，今年5月宣布與洪永城分手後，曾表示現階段以工作為先，全力發展餅店生意。回復單身的她，最近愛上運動，頻頻做Gym Keep靚Body，變得愈來愈索，難怪不時谷胸上陣晒身材。
叫定食物等新歡
過往鍾情運動型男的詩詠，最近終於破「Dry」缽，不過見她揀另一半的口味都轉埋。昨日發現她與一位年約30歲、身形健碩、打扮斯文的西裝男到金鐘拍拖。約下午1時，不用開工的詩詠獨自駕車離開將軍澳寓所前往金鐘，由於周日關係，該處商場的停車場爆滿，向來慳家的詩詠，未知是否心急見新歡，寧願去附近酒店搵代客泊車職員代勞，都唔想慢慢排隊。
戴黑超的詩詠將座駕交予代客泊車職員後，先去櫃員機撳錢，然後去附近餐廳搵位，細心地叫定食物等新歡。數分鐘後，西裝新歡前來會合，詩詠見到對方即笑到見牙唔見眼，更「開籠雀」上身傾個不停，兩人面對面坐邊食邊傾，有講有笑。原來西裝男之前去了買《雷神奇俠3：諸神黃昏》戲票，故兩人撐完枱腳後，即雙雙乘扶手電梯往下層戲院。
睇完戲繼續傾
沿途見詩詠與新歡繼續雞啄唔斷，直至行到戲院門口依然傾唔停。未知是否怕被人認出，兩人在電影開場後5分鐘才入場。約兩小時後戲院散場，詩詠與新歡步出時邊行邊傾，估計是談論電影劇情。
----------------------------
東網巨星開咗ig喇，大家快啲follow啦！