試新嘢！胡渭康想開騷玩空中瑜伽

歌手胡渭康現身慈善晚宴，他透露年底有很多慈善活動，笑言也怕去錯地方，他又指直到年底的工作已排滿，但今年為籌備個唱而減產，就算除夕也不會連踩幾場騷。

提到將於明年（18年）2月舉行的個唱，他稱時間緊迫：「依家一路排練緊，放假係冇可能嘅事，我同音樂監製傾緊個Rundown，發覺真係冇乜時間。（有乜特別構思？）依家睇吓保險嗰邊搞唔搞得掂，我想將空中瑜伽搬入演唱會，但要睇埋場地、保安、消防同保險。我想喺演唱會試多啲新嘢，因為唔知仲可以開多幾多次演唱會，希望個演唱會令大家記得。（你會親身上台做空中瑜伽？）當然會，我平時都有做空中瑜伽。（要練定高難度動作？）未必要，因為難度高嘅動作只係攣埋一舊，未必有美感，好似好多年前衛蘭個唱片封套，都係做咗個有難度嘅瑜伽動作，但個美感就爭啲。（照練習空中瑜伽先？）我平時都有做，我一星期做四日運動，啲人問我辛唔辛苦，我覺得OK，我做運動係減壓。」