想當年！黃建東代表香港到南非宣揚環保

藝人黃建東（Derek）日前到烏溪沙出席「Ecozine海灘清潔比賽2017」活動，為大自然盡一點綿力，就算身水身汗都毫無怨言。他表示中學時期是公益團體的活躍分子，曾到郊野公園植樹、清潔海灘及探訪老人院，自己較為喜歡到大自然做義工：「平時放假我就會行山，踏吓單車同去海灘游水。」

Derek表示剛清潔完這裏時，認為大眾的公德意識都需要提高：「見到好多食物包裝，啲人可能會求其埋喺海灘就算，仲有木板嘅釘都好危險，戴住手套都驚整損。」他觀察到有很多家長帶同小朋友到海灘教導公德意識，感到很有意義，自己將來有小朋友都會讓他們一起感受：「應該由細學習，教育係好緊要。（試過同父母一齊清潔海灘？）少啲，我媽媽驚曬，而我爸爸行山時見到有垃圾都會執走，佢意識好好。」Derek回想就讀中六時，代表香港到南非交流文化和環保：「當時全香港得六個代表，去咗個保護區見到可以直接喺河流斟水飲，番到香港環保意識高咗，好節約用水。」他認為現時垃圾分類的措施做得很好，問會否支持徵費？他直言有好有唔好，最重要能夠培育到公民意識，讓小朋友從小知道垃圾要跟身，不可隨便拋棄。

Derek表示現時於宣傳無綫劇《降魔的》，他飾演一個戀襪癖的乘客，要求買馬國明對襪：「吳若希喺我社交網度留言話愈嚟愈欣賞我，叫我加油。仲有好多朋友睇完同我講『我覺得好嘔心，但好鍾意你。』對我又愛又恨。」

他表示拍攝時曾做街訪，發現有人會用好高價錢購買別人穿過的襪：「男女款都有，最高價都幾萬蚊一對。」他藉此澄清在《降魔的番外篇》不再是這角色，而會做一個科學家，會在《降魔的》播完後於big big channel播出。而他表示早前乘搭一架設備齊全嘅的士，大讚該司機敬業樂業，十分細心體貼：「好似搭緊外國長途車，甚至飛機，連電話充電器同香港地圖都有真係好感動，連布置都好有心思，所以就甫咗張相上網，估唔到有咁多朋友支持轉載，好人好事係值得表揚同鼓勵。」