無綫禁色令 張秀文台慶戰衣改着旗袍
有關無綫發出內部新指引，指以後拍劇不應過份賣弄性感，要拍三點式或浸溫泉鏡頭要着t-shirt，強姦、床上戲要意會形式交代。
而曾拍節目《3日2夜》，又試過在無綫劇《同盟》中拋胸拍色誘戲的張秀文，她回覆東網稱：「《3日2夜》其實我都好耐冇拍，對上一次已經差不多係兩年前，而《同盟》裏面雖然有一套性感服裝，不過劇情都係搞笑，雖然係用身材引開對手注意，但整段都係以喜劇誇張手法去表達，完全冇色情成份，都係為博觀眾一笑，加上成年我幾乎冇拍過公司節目同劇集，所以自己唔擔心，而且出面拍嘅網劇同電影，導演同監製都發掘我做喜劇演員，覺得我係好搞笑，而唔係好性感，會有性感打扮都係出活動、做大show着晚裝先有，自己都係參考荷里活女星行紅地氈的衣着，同佢哋比較自己好小兒科，完全唔及人地1/10性感！（會收斂一吓？）今年台慶本身想再試唔同嘅性感風格，依家應該要重新搵衫，可能要改穿旗袍，哈哈哈！」
----------------------------
東網巨星開咗ig喇，大家快啲follow啦！