馬國明爭視帝平常心：唔會咁小學生

入行17年的馬國明向來演技備受認同、形象健康、有觀眾緣，不過就被視為接得最多「膠劇」的小生，網民及觀眾都相當戥他不值，雖然馬國明從未企出來大吐苦水，但網民已於社交網齊齊為他平反而呻冤。馬國明擔正的劇集《降魔的》正在熱播，馬國明在劇中有不少催淚演出，實在令人讚嘆、刮目相看，網民大讚故事情節感人、連續幾晚睇到喊，還熱推馬國明為今年台慶視帝最佳人選，令之前坐定粒六的王浩信遇到勁敵了。

網民捧做視帝

身在上海拍電影的馬國明接受東網訪問時，坦言對於觀眾及網民喜歡《降魔的》一劇而感到很開心，對於網民力推他做視帝，他謂：「對於演員嚟講，觀眾嘅認同、鍾意套劇已經好開心，自己都做咗17年，不嬲對獎項都係平常心，唔會話嗰一年套劇呼聲好高，就好想攞獎，嗰一年冇乜聲音，就唔開心，唔會咁小學生，每年都係平常心，而且台慶上面嘅全部都係好朋友，邊個攞都會戥人開心。」他又指反而希望《降》劇可以奪得「最佳劇集」奬項，因為公司沒有一個獎是頒給最佳監製及編審的，但此劇劇本很好，監製與編劇很用心寫了一個很好的劇本。

拍劇要睇心態

問到馬國明過往哪一年覺得特別感失望時，他謂：「其實真係冇乜邊年失望，反而如果自己攞獎，會有啲受寵若驚感覺，唔係好相信係自己咁！」說到網民戥他經常接「膠劇」而不值，對此馬國明坦言：「我記得黎耀祥曾經喺一個訪問度講過，佢演藝生涯入面，接到一個好劇本已好好彩，因為好難接到好劇本，如果你問我，好老實講，出道到依家17年，我自己遇到幾多個好劇本，真係一隻手掌數得晒，所以唔係個個都咁好，如果遇到唔係咁好嘅劇集，就要睇你心態，好似套劇裏面好多可以畀你學習嘅前輩，你可以學吓嘢吸收吓，如果你接受唔係好好嘅劇本，但搵到嘢學，可以用得番，唔會係嘥嘅，自己用心做啦，得唔得自己睇運氣、緣分，學齊咗所有嘢遇到好劇本就要自己把握同感恩。」

----------------------------

東網巨星開咗ig喇，大家快啲follow啦！

https://goo.gl/KGuo2N