藝人樂瞳獲邀到澳門欣賞一年一度澳門格蘭披治大賽車，不過卻發生一段小插曲，差點令樂瞳錯過精彩賽事！樂瞳說：「其實我都知自己大頭蝦，估唔到我又一次撞板！因為我之前去日本拍節目，我竟然將身份證夾咗喺passport度，到今朝早喺碼頭過關，我至發現冇證呀！於是我叫屋企人十萬火急運張身份證嚟碼頭畀我，你話我幾大意呢！」

雖然出了點小意外，幸最終無阻樂瞳欣賞精彩賽事，她說：「澳門大賽車入面有個GT世界盃，係我每年最期待嘅賽事，除咗緊張刺激，仲有香港賽車手參與，我希望佢哋可以為香港爭口氣！不過賽事開始冇耐，發生咗意外，睇到十幾架車撞埋一齊，又有火花，我緊張到大叫，真係心都離一離！幸好冇人受傷，好快就清理現場，賽事可以繼續，但可能我嗌得太落力，嗌到聲都沙埋！（有冇興趣落場賽車？）當然有啦！細個已經鍾意玩碰碰車，大個考車牌，我好享受駕駛樂趣。不過，有段時間冇揸，最近又想揸番，我發現車牌唔見咗，學牌、P牌有喺度，偏偏唔見咗張正式嘅車牌，我係咪好大頭蝦呢！」