自編自導自演　古巨基發明機械人

歌手古巨基（基仔）為保險公司拍攝微電影廣告兼做埋導演，雖然之前基仔做過自己MV導演，做廣告導演亦不是第一次，不過他表示今次好好玩、好Enjoy，他說：「除咗執導，度故仔、拍攝前期準備、後期製作，我都係其中一員，係一條龍服務㗎啦，今時今日嘅服務係需要咁嘅。」

微電影主題係「初心英雄」，基仔在戲中飾演「阿基」，由細到大都鐘意機械人，但因為現實問題，長大後在車房工作，實現不到做機械人的夢想。不過他沒有放棄，每晚收工留在車房自修，不斷去試做機械人，最後成功發明了機械人，還上科技雜誌封面。

加入自己故事

基仔坦言微電影加入了自己的故事，他說：「我自細就已經好鍾意機械人，仲記得05年我第一次紅館演唱會有好多機械人、動漫嘅元素喺入面。細個嘅時候，我真係以為可以設計太空船、機械人㗎！我真係有畫過啲圖則㗎！雖然現實生活中我冇設計到機械人出嚟，但今次喺呢部微電影廣告入面，都算發生咗，幾有意思、幾得意。」

難忘同小朋友做戲

基仔表示廣告最難忘是有好多同小朋友的對手戲，他說：「行內都知，拍小朋友相對要花更多時間同耐性，佢哋冇糖食又會影響到心情、攰又影響到心情，哈哈，所以要引導佢哋。總之過程令到佢哋開心，佢哋就可以表現得好好㗎啦。」由度故仔到做導演又做男主角，還要唱廣告歌，問到基仔是否收四份酬勞？基仔望住揸機的攝影師開玩笑話：「今次冇乜錢收呀，使晒落去做製作囉，嗱，啲錢畀晒揸機個人呀，你哋收晒我啲錢呀！」