東方日報C1：宣萱密執數百萬拒以約換獎

宣萱在劇集《不懂撒嬌的女人》中飾演「Mall姐」入型入格，令她成功捧走馬來西亞視后的殊榮！有名自然有利，因劇集效應，宣萱人氣爆燈，Job接Job賺超過七位數！再封視后的宣萱講到加人工即自稱是「龍蝦價」，但講到以約換獎即「Mall姐」上身，企硬說不能接受：「畀咗獎我都唔會開心啦！」

藝人宣萱憑年初的話題劇集《不懂撒嬌的女人》中女強人「Mall姐」一角，成功在前晚舉行的《TVB馬來西亞星光薈萃頒獎典禮2017》中撼贏上屆得主胡定欣、「新加坡視后」李佳芯等熱門人選，獲得「最喜愛TVB女主角」大獎，成為出爐馬國視后，亦是繼1999年憑《刑事偵緝檔案IV》後，事隔18年再次成為觀眾心中的最佳女主角。

據知《不》劇播出後，宣萱憑「Mall姐」的人氣接下多個廣告，同時間亦有不少內地劇集及工作向她招手，頻頻到內地工作的她今年的收入已超過七位數字，豬籠入水，今次再度得獎更是錦上添花！宣萱昨日與出爐視帝苗僑偉等人從馬來西亞返港，她戴着口罩現身機場時略現疲憊，問到會否為「封后」慶祝？她說：「冇時間喇，聽日就要飛去橫店拍劇，依家都趕住去超級市場入貨，要準備作戰呀！」

超市掃貨再作戰

宣萱坦言行程奔波感到疲累，開心過後更感到虛脫：「事隔咁多年再拎獎，當然係好開心，最開心係可以同三哥（苗僑偉）一齊拎獎，之前都合作過好多套劇。（覺得係遲來的春天？）可能之前冇呢個獎啫！」問再封視后的宣萱會否再加人工？她笑指自己是「龍蝦價」，早前已加過人工：「其實之前都加咗喇，簽咗經理人後人工都調整咗，我哋係海鮮嚟㗎嘛，之前加少少，依家就係龍蝦囉！（貴為視后應該再加？）都唔係嘅，價錢人工就留畀經理人去傾，由佢哋去決定，接到咩工作我都照做嘅。」

明年頒獎禮平常心

今仗被視為於明年1月舉行的《萬千星輝頒獎典禮》的前哨戰，問宣萱有否信心在香港再下一城？她表示會以平常心面對，講到近年經常有「以約換獎」的傳言，宣萱聞言即「Mall姐」上身，企硬表明立場說不會接受：「我一定唔會去簽約換獎，你畀我咪畀我，唔畀都冇所謂，因為咁畀我都冇乜意思，畀咗獎我都唔會開心，覺得拎獎係要靠實力，要靠觀眾投票，如果值得先畀我囉！」

另外，與宣萱齊獲「最喜愛TVB電視角色」的高海寧及唐詩詠情同姊妹，宣萱得獎，詩詠直言想不到「家姐」宣萱再下一城獲封馬國視后，是全晚最開心的一刻！而高海寧除了戥宣萱開心，要多謝同劇的詩詠：「我拍嗰陣唔知點演繹，有喊過，所以特別多謝詩詠同成個團隊，先令我發揮得咁好同埋有獎。」

更多新聞，請瀏覽東方日報網頁：

http://orientaldaily.on.cc/