志偉讚繼承邵逸夫宗旨　方逸華明出殯

藝人曾志偉到北角香港殯儀館出席無綫非執行董事方逸華設靈。他在下午六時45分離開現場並接受記者採訪。訪問時，他便透露方逸華喪禮以佛教儀式進行：「佢對影視界好多貢獻，大家相處咗幾十年，好多謝方小姐對同事嘅關懷，佢好愛電影界同電視界，都好關心員工，份人好細緻，無論係一片草、廁所乾唔乾淨定係間餐廳，佢所有嘅心意都係花費喺呢個行業上。由邵氏年代到TVB年代，佢一直都跟隨邵生（邵逸夫），繼承咗佢嘅宗旨。」

曾志偉又指方逸華一路以來都好支持一班員工：「作為後輩、同事，都對方小姐充滿尊重。（難忘事？）每次拍嘢時，方小姐都會好鼓勵我哋，話『拍啦、拍啦』，雖然好多都蝕咗本，但係都好支持我哋。佢對我哋嘅工作係不離不棄，覺得自己唔係有心蝕晒佢啲錢，話啲錢會賺得番。」至於心情是否已經平復？他謂：「佢又係我老闆，又係我朋友，咁當然會唔開心。之前台慶都好希望方小姐會出現，點知佢最後都冇出現，我覺得好難過。希望12月時喺追思會度用多啲心思同佢道別。」

樂易玲與六嬸共事半個世紀

另外，無綫高層樂易玲亦有出席方逸華的喪禮，她晚上九時許離開殯儀館，當時心情仍未平復，在接受訪問期間多次哽咽及深呼吸，她謂：「個個都好掛住佢，佢真係好錫我、好錫我哋，佢係我嘅親人，我哋共事半個世紀，追思會方面已經同舊同事、好友開會，希望大家都嚟到，呢件事真係好突然，自己唔相信，但都發生咗。」她又指方逸華明天於十一時出殯。