歌手黃翊到電台宣傳新歌《我的光》，表示相隔24、25年再出歌，心情興奮，亦謂6月時已收到歌，但現時錄音跟以前很不同：「以前我兩、三個鐘就得，但呢首歌我錄咗4、5次，以前係講技巧、震音，依家係重感情多啲，要打動到人先得。」他亦謂MV是劇場版，在最近返回幕前的廖駿雄的廚餘中心拍：「嗰度好大，成個山頭，去到直情邀請埋佢同我一齊拍，因為佢同我經歷都有少少似，又係好多年冇做幕前，但依家出返嚟，佢都好豪爽即刻應承。」

他亦謂明年會推出大碟：「依家都錄緊音，會出3至4首新歌，都會有舊歌翻唱，同埋會唱一啲我鍾意嘅歌手嘅歌。」問到現時返回幕前慣唔慣？他謂反而攰啲：「因為要錄音、宣傳、又有演出，夜晚又要返舖頭幫手，始終舖頭係我生活嘅地方，依家唱歌係興趣，以輕鬆嘅心態去做，舒服自在咗，同埋我個仔依家12歲，太太身體弱咗又要照顧佢生活，所以就攰啲。（聖誕有冇得抖吓？）我都有啲工作同商演。」他亦開心透露歌迷會相隔廿多年後重組。