樂隊The Boogie Playboys想出黑膠碟

樂隊The Boogie Playboys到銅鑼灣舉行新碟發布會，獻唱《勁正》及《悶棍》等新歌，全場爆滿，氣氛熱鬧。受訪時，成員Barry坦言很開心邀請到許懷欣（Ryan）擔任嘉賓：「佢爸爸許冠傑對我哋影響好大，佢早期嘅音樂帶有Rockabilly嘅成份，唱廣東歌又好代表到香港。之後我哋夾Band識到Ryan，今次邀請佢嚟交流，係朋友間嘅支持。（有冇見過許冠傑？）撞過佢，但冇正式約出嚟。」

說到首次開新碟發布會，Barry透露有點緊張：「呢幾年做過好多騷，但自己孭飛就第一次。（襯晒衫？）我哋平時都有啲造型。」主音Felix指身為Rockabilly樂隊，會以不同造型配合演出，而他對這方面認識較多，會建議隊員作不同打扮：「參考50年代登台啲人着嘅衫、嗰陣興咩服飾，或者向現代外國或香港嘅Rockabilly樂隊取經。」

問到稍後有甚麼騷？Barry指12月10日會參與音樂節，與Joey Tang及夏韶聲等人演出，而其他就要視乎新碟反應再決定：「希望喺香港試多啲唔同嘅場地。（點解有信心出碟？）我哋最主要想出黑膠，因為玩復古音樂有隻黑膠會似樣啲，今次都叫圓咗夢，嚟緊會唔會再以黑膠或CD形式就唔敢講住，但都會繼續推出我哋嘅音樂。」