麥明詩fb自揭曾遭性侵：係唔止一次
20171203
東網電視
更多新聞短片
麥明詩喺facebook發文自揭曾遭性侵。
日前有「香港欄后」之稱的港隊田徑跨欄女將呂麗瑤在社交網站透露曾被前教練性侵犯，而前港姐麥明詩亦喺facebook自揭曾遭性侵，佢發文表示：「#metoo 相信唔少女仔都曾經遭受性侵犯，我亦都唔例外，仲要係唔止一次添；有啲係我阻止唔到；有啲係之後諗番，如果我醒覺啲我可能可以阻止到…受害者能夠鼓起勇氣面對呢件事，知道錯唔係自己，呢個係第一步。但係之後呢？」
佢解釋冇採取進一步行動，係因為：「事情係喺內地發生，香港法庭係冇jurisdiction（司法管轄權）…」
麥明詩fb全文：
#metoo 相信唔少女仔都曾經遭受性侵犯，我亦都唔例外，仲要係唔止一次添；有啲係我阻止唔到；有啲係之後諗番，如果我醒覺啲我可能可以阻止到……受害者能夠鼓起勇氣面對呢件事，知道錯唔係自己，呢個係第一步。但係之後呢？
呢個時候，受害者除咗自責之外好可能會有兩個感覺：1，報復，to make him pay for his wrongs，人之常情矣，好聽啲嘅term係“retribution”；2，唔希望呢個人可以繼續危害到其他嘅victim。
當然法治精神唔允許我地（哋）以法律之外嘅方法報復，法治精神呢一點相信我喺以前嘅post都有提過。所以要真係除害得黎（嚟）又要對嫌疑犯公平而唔未審先判，唯一可取嘅方法係透過法律去制裁。
呢個時候，大部分女仔都會放棄，而我自己經歷嘅諗法係咁樣：
當時得我同佢，姐（即）係口同鼻抝（拗），點解要信我多過佢？咁睇嘅話，佢嫌疑程度只得50:50，但係50:50姐（即）係告唔入啦。而我當時仲要讀緊法律。
所以我希望透過呢個post，分享一啲自己嘅體會。
首先，要相信court trial。雖然係“my words against his words”，但係其他環境證供都會幫到。檢控官(P)可以cross-examine被告(D)：
P：點解你要帶受害者返屋企？
D：幫佢按摩
P：咁點解唔係喺學校？
D：…諗住喺邊都冇所謂
P：定係你怕被人見到？有其他企圖？
就算佢堅持話係（喺）屋企冇越界，呢點被告都好難解釋；我唔係律師，相信一個真正律師會可以摧毁被告嘅證供。
第二，想加強個case，就儘（盡）量保存好呢啲環境證據。例如，嘗試留有文字證據，透過whatsapp質問對方，例如：
V：點解你今日要咁樣做？
D：我做咗啲咩
V：你叫我除褲
D：咁先按摩到
雖然咁樣唔足以證明佢非禮，但係已經將佢要你除褲呢一點establish咗冇得拗，佢唔可以喺庭到（度）話：「我冇叫，佢自己話要除」。
就算唔直接對質，同可信任嘅人講番件事，到時呢個人都可以為檢控方作供，而當兩個證供係冇inconsistency，就可以加強受害者證供嘅可信性。
當然一個受驚嘅女仔，喺當刻就可以諗到呢啲嘢，係冇可能嘅。呢啲都係我之後不斷反覆思考先諗到嘅嘢，所以我希望分享可以幫到未受過害嘅女仔。
我相信，法律係最接近公平嘅裁判方法；佢唔係完美，一定有犯罪者法外逍遙；但係比起網絡審判、私刑，法律係有好多程序保障，希望賦予每一個人一個opportunity to be heard。
審訊係一個好困擾嘅過程，就算覺得有足夠證據，有唔少人都會放棄起訴，因為唔想被呢件事纏繞落去。但係我地（哋）都唔應該因為怕煩而用其他方法去達到retribution，因為咁樣係對對方唔公平。大佬呀，佢咁樣傷害我，我仲要諗點樣先對佢公平？哈哈我自己都未必做到。但係呢個係我希望追求到嘅ideal。
呢點帶到去最後嘅point：防患於未然。對於我來講，empowerment除咗係受害之後唔怕講出黎（嚟），更有效係可以透過自己嘅力量防止呢個傷害。所以呢啲經歷鼓勵我要懂得自衛（衞）－我唔係需要打贏一個男人；但係只要製造到一個逃走嘅契機就已經足夠。於是幾個月前我決定咗要學柔術。
PS，大家可能會問我點解冇採取進一步嘅行動，咁係因為事情係喺內地發生，香港法庭係冇jurisdiction…
PPS，我真係唔係律師，只係讀過啲theory，好多都還咗俾（畀）老師，所以有需要請尋求專業法律意見
#男仔都應該要自我保護 #被性侵唔係女仔專利
----------------------------
東網巨星開咗ig喇，大家快啲follow啦！