B仔出世！李雨陽多謝老婆：感受母愛偉大

38歲藝人李雨陽喺今年6月嘅時候，同拍拖半年嘅圈外女友鄭嘉詠拉埋天窗，結婚唔夠一個月已經宣布太太懷有四個月BB，仲幫BB改咗個花名叫「小芝麻」添！

今日李雨陽喺社交網站公布囝囝「小芝麻」出世嘅好消息，而且上載咗多張太太同「小芝麻」嘅合照，但係「小芝麻」嘅靚樣就用圖案遮住咗，唔知佢似爸爸定似媽媽呢？睇見李雨陽同太太分別抱住咗「小芝麻」嚟錫，認真溫馨！

李雨陽話太太畀佢感受到母愛嘅偉大，仲話會用盡力氣去愛護太太，佢留言：「小芝麻終於出世啦～首先要多謝老婆，妳讓我親身感受母愛的偉大，孩子出來的那一剎那，淚水也忍不住了，哭了良久才反應過來，我會用盡餘生的力氣去愛護妳們，再一次謝謝關詠恩醫生，是妳兩次在我們想放棄的時候，讓我們鼓起勇氣繼續努力，最終小芝麻在妳的幫助下，順利出生，謝謝妳～ ​​​​」