天生雙缺陷勝在IQ高 裙腳仔森美踩女上位

2017年12月05日 00:00
東網電視
更多新聞短片
森美踩女上位!

出身草根家庭,細個時家住葵盛西公屋嘅森美,阿爸幫佢改咗個平民名叫梁志健,同天下父母心一樣,都係望個仔有堅定志向,最緊要身體健康!可惜唔知個天係咪有心玩嘢,森美同佢阿爸嘅期盼差好遠,家族性情緒病遺傳同專注力失調症打孖嚟,以為有先天缺陷,多數讀書不成做廢青啦,點估到佢讀書仲勁過晒啲正常小朋友,唔使阿爸搬名校網、阿媽輪街籌叩校門,好叻豬咁入讀喇沙,上大學時仲巴閉到同孫耀威有「中大雙雄」之稱。

賤嘴唔收累及小儀

森美唔止IQ高,仲有出眾口技,天生嗰條無往而不「脷」,攣都可以拗番直,死都畀佢拗番生。21歲仔,大學未畢業就用口水浸死晒其他DJ選拔賽對手入咗電台做,自我感覺良好到封為「早霸王」同「架勢堂」。少年得志,聽慣人叫「森美哥」前,「森美哥」後,以為同偶像陳百祥同月同日生,染埋一樣嘅銀白髮色就水鬼升城隍,做正牌金牌司儀,人哋阿叻喺呢行撈咗半世人,財雄梗口大啦。森美衰無自知之明,廢噏當秘笈以為好風趣,搞咗個「我最想非禮女藝人」選舉,公開挑戰女性尊嚴, 佢要自殺式身亡唔緊要,生吞137宗投訴、被電台封嘴兩個月,連中大講師份工都冇埋,最慘係累拍檔阮小儀要陪葬。

森美把口係賤,但有本事成世人靠女人,唔聲唔聲娶咗個索爆老婆返屋企幫佢啤咗對仔女,喺電台又有甘願做佢腳底泥、口誅筆伐嘅阮小儀,再到佢入無綫拍劇集《法網狙擊》,第一次做男主角就同索腿天后陳敏之談戀愛,陳敏之話要同森美好似《史密夫決戰史密妻》套戲咁打床頭交,搞到森美多咗個「香港畢彼特」嘅稱號,不過山寨貨同正牌畢彼特邊有得比,人哋就係萬人迷,森美只係「裙腳仔」,皆因佢有鋪影人裙下腳癮,仲要影成過千張,啲腳多到開250枱麻雀,好在仲有「香港安祖蓮娜祖莉」即森美嫂闢謠話老公唔係變態,影腳唔代表有「戀腳癖」,但可以當減壓藥,呢個解讀夠晒神奇。

高Ling「打雀」眼睩睩

森美真係食得太多腳,雞、鴨、豬腳統統塞入口, 啜得多骨膠原令蛋白質增生,喺短短三個月化身爆肌男,原先一副弱雞樣練成爆肌男,自信心返晒乜都夠膽死!喺日本同黃心穎、高海寧浸溫泉時,突然揈走圍住下身嘅毛巾露「鳥」,兩位女神即扮驚,但又好似睇脫衣舞男Show咁興奮,名花有主嘅高Ling仲打雀咁眼偷𥄫嘢,搞到《森美旅行團》變咗《森美女淫團》咁重口味。有肌等如有機,上咗位嘅森美喺《誇世代》雖然唔係男一,但同陳豪鬥晒肌又肉搏,亮點係佢哋段斷背情,不過森美妻又唔使驚到要食鎮靜劑,老公喺節目度流埋眼淚話掛住老婆,就知對糟糠一往情深,甜過糖尿,不如打定胰島素降血糖仲好啦。