最難忘聖誕節　蔡一傑曾5呎高墮地撼穿頭

組合草蜢及陳寶珠出席慈善聖誕活動，而蔡一智因病缺席。接受訪問時，蔡一傑指阿智因為發燒而需要留在家中休息。談到難忘嘅聖誕節，傑仔透露有年聖誕同蘇志威去咗尖沙嘴影相，向後退嘅時候不慎向後跌，更撼穿頭，笑言：「嗰度都有4、5呎高㗎，之後入咗急症室，縫咗5針，流咗好多血，冇得玩，喺醫院過。」蘇老闆指當時負責揸機，當記者笑言問到係咪有心玩傑仔，蘇老闆即笑言：「梗係唔係啦，攝影師多要求，有咩事我點賠番個仔畀人哋阿媽呀！」至於提到今年聖誕節，兩人表示要喺綵排中度過，因為稍後就會去到馬來西亞舉行演唱會巡迴，一月更會到美國LA繼續巡唱。

另外，兩人指認識兒時偶像寶珠姐咁耐都係首次同場出席活動，更覺得能夠參與咁有意義嘅活動好開心。