偷食糖受罰 陸永細女出盡辦法都?唔甩

20171207
東網電視
更多新聞短片
Simsim真係好搞笑呀!
藝人陸永嘅囡囡大女陸一穎(Hannah)同細女陸一心(Simsim)向來都係一班網友嘅寵兒,事關佢哋兩個完全遺傳咗爸爸嘅搞笑基因,經常引發出不同嘅笑料。陸永嘅太太Reina今日就喺社交網站上載咗細囡Simsim嘅短片,事源Simsim偷食糖,所以被罰一個月內冇糖食。一聽見冇糖食Simsim梗係唔開心啦!所以就出盡九牛二虎之力去求媽咪,不過Reina就似乎唔多受,而陸永見到囡囡咁樣,都忍唔住笑Simsim「語無倫次」。
片段可見,Simsim瞓咗喺張床上面話自己偷食糖,所以就畀媽咪罰冇得食糖。講到冇糖食Simsim表現得相當委屈,之後仲擰轉身遮住自己,好似想喊咁添!頭先明明好似想喊,但係轉個頭就去攬到媽咪實一實,而且仲嘟起個嘴仔,勢要氹掂媽咪畀佢食糖。Reina當然冇咁容易就範,仲話:「冇得食呀!唔會畀你食」,Simsim知自己失敗咗所以成個人攤咗落床。唔少網民都話Simsim好搞笑,仲話佢好有做喜劇嘅天分。
之後Simsim繼續話想食糖,仲係咁話:「下次冇得食,下次可以食」,當佢一聽到陸永話一個月內冇得食糖,佢即時話:「一個月內即係一次囉!」不過Reina就同佢解釋,一個月內即係聖誕節之後再之後,Simsim聽到呢個咁可怕嘅消息,都忍唔住掩面大叫,佢仲話「對唔住電話。」睇嚟冇糖食對Simsim嚟講真係好大打擊,難怪陸永會笑囡囡「語無倫次」。
網民有話兒:
19xxx1pp:對唔住啊,電話。哈哈哈XDDDD Simsim真係好搞笑!
karxxxxan91x:你錫啖papa咪有得食囉!!
pixxy__txxx:攤喺張床度真係太好笑!!生無可戀呀!Simsim真係好可愛XDDD
kxxi_kxkxx:Simsim好有喜劇天份XD 大個係咪要去做搞笑藝人??