陳慧琳Hea爆畀反應 畀仔仔識穿！
歌手陳慧琳（Kelly）出席品牌活動，在台上與羅蘭擺甫士影相。她直言希望與羅蘭一樣永遠心境長青：「佢個感覺好好，又搞笑，個腦好似冇停過咁，諗嘢好快，自己都想同時代一齊進步唔脫節，唔好畀自己停就有咁效果。（唔會諗退休？）依家個moment係唔想，覺得幾好照顧到屋企，唔知未來發生咩事。」問會否待兩個兒子再大啲，需要多點時間參與他們的事情？她說：「可能，如果佢哋需要我多啲，不過應該唔會多過依家，已經好黐身，正常愈大愈唔需要媽咪，都等緊呢一日，但到時就唔會想，又想做佢朋友，再大啲應該唔會講嘢我聽。」
Kelly直言需要跟貼潮流拉近與兒子距離，要知道現時發生甚麼事，都可以跟他們「嗲」吓：「平時會嗲吓卡通片，但我都係扮識，睇唔出我係做戲定真係識。」她笑言大仔開始識分辨自己是否敷衍他們，留意到她敷衍他們時會睜大雙眼：「所以我為意到做呢個動作時，就識畀啲反應佢。」
提及聖誕節，Kelly表示好想去玩：「自己懶，其實計劃好，但有啲阻滯，諗住近近地去三、四日，暑假個旅行就會大啲，一年一次好，爸爸有幾多假就會去幾耐。」