公公恨遊瑞士　曹永廉等蕭正楠擺和頭酒

藝人曹永廉及王君馨（Grace）到油塘出席活動，原來自從劇集《超時空男臣》播出後，這是他們首次一齊出活動搵錢。

問在無綫節目《公公出埠》中，網民指他與蕭正楠鬧出真火？阿廉笑言：「係呀，拍嗰陣真係有火！ 但係即晚已經冇嘢，仲約出去飲嘢！（點睇阿蕭話唔使氹你，仲話唔搵你幾日，你會自動蒲頭？）我哋的確係日日都有聯絡喎，同阿蕭基本上日日都喺電視城見啦！（使唔使佢擺和頭酒？）如果係都唔錯喎，黃浩然可以攞啲花膠嚟，煮埋就有誠意啲！其實幾個男人去旅行，玩吓係開心嘅，又有火花，我哋幾兄弟熟呀，都度緊下一個目的地，想去瑞士滑雪，睇大家時間。（費作費重皮？）TVB大把錢！」

畀家用老婆當聖誕禮物

阿廉又提到平安夜過得好平安：「尋日早收工，約埋屋企人、朋友食私房菜，但今日要做嘢，都提住自己唔可以飲太多。（同老婆玩交換禮物？）男人好少做呢啲嘢，我畀咗家用老婆，就當送咗禮物！」