林奕匡送智能手錶畀同事：少少心意

歌手林奕匡（Phil）出席第15屆「香港冬季購物節」及「香港冬日美食節」活動，獻唱《是日休息絕不工作》之外，還跟現場觀眾大玩遊戲及進行抽獎環節。Phil指昨日（25日）聖誕節與一大班朋友慶祝，更親自切火雞：「本身晏啲都仲有個Party，但冇去，都唔一定要大搞嘅，自己喺屋企搞，好耐都冇切過火雞，啲朋友仲話我切得好純熟。」

問到有沒有收到禮物？Phil笑言在交換禮物中抽到最差的一份：「有金額限制有兩份，其中一份我自己都有，另一份我唔方便講，因為我係個牌子嘅代言人，不過唔緊要，開心就得，最重要係唔好買得最差，因為有懲罰。（咁送畀你個個咪要懲罰？）佢好幸運，有人比佢更差。」他表示沒有跟太太李靄璣（Rikko）交換禮物：「之前有送過一份，但唔知係算生日定係聖誕禮物，本身佢有個袋好鍾意但佢自己買咗，所以我問佢想要咩，佢話『咁又唔使住』，最後都買咗對鞋畀佢。」

另外，Phil亦有送智能手錶給同事：「同佢哋食飯又未必有時間，都係少少心意，因為佢哋唔單止係同事，仲係好朋友，同事唔會凌晨仲幫你睇工作時間，當係全部Artist一齊送。（每年都會花心思諗送咩禮物畀佢哋？）每年唔同嘅，上年就送咗個有紀念價值嘅澳洲銀幣，有祝福嘅意思，今年我都仲有送耳機畀朋友。（唔送你新EP當禮物？）冇喎咁又，係個好提議，叫佢哋拎住影相。」